O goberno, por exemplo, non cre na liberdade
de expresión para os “propagadores de odio”. De feito nin sequera cren que se
lles deba aplicar o procedemento legal. O goberno cre na deportación e nos
xuízos sen xurado. Gobernos do pasado internaron a republicanos irlandeses sen
xuízo e prohibiron que Gerry Adams falase na BBC. Tampouco o goberno francés
está a favor de que a muller se exprese vestindo un burka, prohibido en Francia
durante un tempo o pasado verán. O goberno Tory, aquí, nin sequera cre que aos
sindicatos se lles deba permitir o dereito ilimitado á folga.
Pero tampouco a esquerda cre no dereito
ilimitado á liberdade de expresión. Moitos na esquerda non cren que os
fascistas teñan o dereito á liberdade de expresión, por exemplo. Este paradoxo
sinala o feito de que a defensa da liberdade de expresión sempre debe ir
acompañada das seguintes preguntas: para dicir que? En que contexto? E con que
fin?
Este pensamento materialízase no exemplo dos
antigos retóricos: cando é lícito berrar “Lume!”? Facelo no medio dunha chaira
en Salisbury pode ser excéntrico pero é inofensivo. Facelo nunha casa onde hai
un incendio pode salvar vidas. Facelo nun cine cheo de xente cando non hai lume
pode causar a perda de vidas. Os dous primeiros exemplos son defendibles, o
terceiro debe ser inadmisible.
Un
pouco de contexto histórico
O contexto histórico é moi importante. A
liberdade de expresión (e de impresión e organización sen as cales a liberdade
de expresión neutralízase) entrou na historia durante as revolucións inglesa
e francesa, respectivamente nos séculos XVII e XVIII. Cabe destacar que na
revolución inglesa estableceuse en boa medida para acadar a tolerancia
relixiosa (ben que non para os católicos monárquicos). A liberdade de expresión
era a consigna dos oprimidos e dos excluídos, dos revolucionarios, contra a
elite aristocrática. Estableceuse mediante o uso da forza revolucionaria e a
posterior represión da contrarrevolución —un dato pouco lembrado hoxe polos
avogados da liberté, égalité, fraternité.
Os que afirman que a revolución estableceu a
liberdade ilimitada de expresión e o laicismo militante simplemente non coñecen
a súa historia. Os artigos 10 e 11 da Declaración dos Dereitos do Home e do Cidadán rezan: “Ninguén poderá ser molestado a causa das súas opinións,
incluíndo as súas crenzas relixiosas, sempre que a súa manifestación non
perturbe a orde pública establecida pola lei” e que a “libre comunicación de ideas
e opinións é un dos máis preciosos dereitos do home. Todo cidadán pode, polo
tanto, falar, escribir e imprimir con liberdade, pero debe ser responsable dos
abusos da súa liberdade determinados pola lei”. Así, a Declaración defendeu a
tolerancia relixiosa e limitou o abuso da liberdade de expresión pola lei.
Coa súa orixe no revolucionario 1789 os novos
gobernantes do mundo moderno empregaron o lema da liberdade de expresión pero,
na medida en que foron capaces, negárono á nova clase dos excluídos —a clase
traballadora— e aos oprimidos e ás novas xeracións de radicais.
É por iso que non existe unha liña recta que
descenda desde a revolución francesa ao estado francés actual. O estado francés
actual é tanto o produto da contrarrevolución coma da revolución, do
esmagamento da Comuna de París, da noxenta historia do colonialismo francés, do
caso Dreyfus, da colaboración de Vichy cos nazis, do pouco democrático estado
de De Gaulle e da persecución dos musulmáns modernos. Por loitar contra todo
isto, a esquerda francesa tivo que loitar contra os “herdeiros da revolución
francesa” para defender as liberdades proclamadas en 1789.
Polo tanto, que, no noso mundo, está necesitado
de liberdade de expresión e quen está a abusar do lema da liberdade de
expresión co fin de defender o seu propio poder e riqueza? Quen ten poder e
quen non?
Con certeza, as comunidades musulmás de Europa
atópanse entre os menos poderosos. Existen, sen dúbida, algúns musulmáns que
tamén son brancos e ricos. Algúns mesmo accederon a postos de goberno. Pero a
grande maioría son pobres, con frecuencia os máis pobres, coa pel morena e
discriminados.
O argumentario neo-racista recorre a aquilo de
que os musulmáns non poden ser vítimas de racismo porque o islam é unha
relixión non unha categoría étnica. E moitos liberais tiran por este camiño,
alegando que son críticos coas ideas relixiosas das persoas non coa súa raza.
Pero de facto a relixión actúa coma un eufemismo da raza neste caso, posto que
a grande maioría dos musulmáns de Europa son non-brancos. Por suposto, noutros
países onde os musulmáns están no poder e teñen as pancas do estado nas súas
mans a cousa é diferente. Os cristiáns coptos son unha minoría oprimida en
Exipto, os curdos en Turquía etc. Na suní Arabia Saudita os xiís están
oprimidos, do mesmo xeito que, primeiro os protestantes e despois os católicos eran
discriminados en Inglaterra.
E ademais da discriminación e a pobreza os
musulmáns en Europa viron aos seus parentes e amigos, os seus correlixionarios
e compatriotas seren asasinados en cantidades industriais polas intervencións
militares de Occidente en Afganistán, Iraq, Siria, Iemen, Somalia e outros
lugares. E eses son precisamente os países máis afectados pola guerra contra o terrorismo,
sen importar canto tempo e como de sanguento fora a historia do colonialismo
occidental. E mentres a matanza continúa, acúsase á relixión desa mesma xente de
culpable dos conflitos nos que eles son as vítimas maioritarias.
E como podería alguén desas comunidades ter o
poder para contestar á recente frase de Rupert Murdoch na que dicía que todos
os musulmáns son culpables do cancro do terrorismo? Que rede global de noticias
poden eles poñer en marcha para responder? A verdade é que a “liberdade de
expresión” non é un campo de xogo neutral, este é moito máis favorable para o
estado e os ricos que para os pobres e os oprimidos.
Os liberais semellan non entender isto. Nunca semellan
ver que todos os dereitos de igualdade abstractos vense socavados pola
desigualdade económica e social. Como dixo Anatole France: “na súa maxestosa
igualdade a lei prohibe, a ricos e pobres por igual, durmir baixo as pontes,
pedir esmola nas rúas e roubar barras de pan”.
E é así como debemos avaliar esas reclamacións
que din servir á liberdade de expresión: estas reivindicacións actúan para
magnificar a voz dos que non teñen voz… ou para servir aos que queren mantelos
en silencio? As caricaturas racistas cos musulmáns de Charlie Hebdo, non
importa se estes pensaban que era iso o que estaban a facer, servían a aqueles
que desexan manter aos oprimidos marxinados.
En resposta á matanza de Charlie Hebdo algúns
na esquerda chegaron a cruzar a liña que media entre condenar totalmente os
asasinatos e apoiar o contido da revista, sostendo que este forma parte da
tradición laica de Francia.
Pero esta visión secular e laica, aínda que
poida ter as súas raíces na oposición das revolucións burguesas á relixión, ten
outro significado completamente diferente entre os musulmáns e outros
inmigrantes. Serven para soldar ideoloxicamente á poboación co estado francés.
Pero, responden algúns na esquerda,
especialmente os que se pretenden marxistas, somos ateos e, como os
secularistas liberais, inimigos da relixión. Nada podería ser unha caricatura
máis crúa do marxismo. É certo que un marxista —como fixo Laplace cando Napoleón lle
preguntou porque no seu sistema non hai un lugar para deus— pode responder: “non
teño necesidade desa hipótese”. Pero iso é só o comezo do problema porque os
marxistas son materialistas antes que ateos. Entendemos que a relixión non será
abolida con argumentos racionais ou diatribas laicas, tipo Richard Dawkins.
Marx e
a relixión
Para Marx a crenza relixiosa era unha reacción
á opresión e á alienación:
“O sufrimento relixioso é, á vez, a expresión
do sufrimento real e unha protesta contra o sufrimento real. A relixión é o
suspiro da criatura oprimida, o corazón dun mundo sen corazón e a alma dunhas
condicións desalmadas”.
Por esta razón, como sostivo James Meadway,
non haberá un momento de conversión secular antes da revolución trala cal as
masas marcharán á vitoria. Foi precisamente por esta ilusión pola que Marx
atacou aos Hegelianos Novos. A revolución, e toda loita antes dela, será feita
por traballadores de crenzas moi diferentes e de ningunha.
Pero, se isto é así, entón temos que formular
outra pregunta aínda máis concreta, unha que nunca semella ocorrérselles aos “marxistas”
seculares: que grupos relixiosos, baixo que circunstancias, poden pular por
unha política progresista e que grupos relixiosos pulan por políticas
reaccionarias?
Un intre de reflexión revela que se precisa
dunha análise máis sofisticada que o simple laicismo co fin de responder a esta
pregunta. En diferentes momentos e en diferentes condicións as relixións poden
desempeñar diferentes roles políticos. O puritanismo era unha forza
revolucionaria na revolución inglesa do século XVII, pero hoxe non. A teoloxía
da liberación católica desempeñou recentemente un papel progresista en
Latinoamérica, pero a igrexa católica é unha forza reaccionaria en Italia. En
Irlanda a igrexa católica en xeral foi unha forza reaccionaria pero o
catolicismo sempre estivo asociado co republicanismo irlandés.
Este tipo de diferenciacións necesitan ser
aplicadas aos musulmáns. O réxime Saudí é totalmente reaccionario e é unha das
trabes mestras tanto a nivel ideolóxico como organizativo do Estado Islámico. É,
tamén, un aliado de sempre dos gobernos occidentais. O Estado Islámico é unha
forza reaccionaria e contrarrevolucionaria que emerxeu debido tanto ao fracaso
da guerra contra o terrorismo como das revolucións árabes.
Pero a inmensa maioría dos musulmáns en Europa
non teñen nada que ver con esa ideoloxía. Para a maioría dos musulmáns en
Occidente a súa relixión, en xeral, fai fincapé na paz e na xustiza. Son
maioritariamente pobres e de clase traballadora. Mesmo en pequenos negocios
musulmáns a xente é pobre e réxese polo tipo de costumes dos musulmáns de clase
obreira das áreas nas que operan. E estiveron abertos ao compromiso en
movementos progresistas, especialmente no movemento antiguerra. Por suposto,
cando a esquerda lles volve as costas en nome do seu rexeitamento á relixión,
outras forzas, dende o stablishment político aos islamismo extremo, gañan
audiencia.
Os irmáns Kouachi que levaron a cabo o ataque
contra Charlie Hebdo son un exemplo clásico disto. Eran orfos, pobres e de
ascendencia alxerina (co que isto significa en termos de racismo en Francia,
brillantemente explicado por Robert Fisk). Traballaban en postos mal pagados e,
un deles, soñaba con converterse en rapeiro. Estiveron involucrados no crime e
pasaron tempo na prisión. Finalmente atoparon, como moitos outros o fan,
significado na relixión. As brutalidades de Abu Ghraib e a guerra de Iraq
converteunos en terroristas, en ferramentas dunha forma reaccionaria do islam.
A dereita (e os liberais seculares) están
dispostos a acusar ao islam por isto. Confunden a forma de expresión coa causa.
A maioría dos musulmáns non son terroristas nin apoian aos terroristas. Pero
algúns si o fan. Por que?
A cousa é un pouco así: imaxina un cuarto
pechado e cheo de xente. Imaxina que alguén está fóra da sala aumentando
constantemente a temperatura da mesma. Algúns dos atrapados desmaiaranse ante
os demais. Outros entrarán en pánico. Outros manteranse en calma. Na nosa
sociedade a temperatura sobe por causa do racismo, a pobreza e a guerra
imperial. Algúns arremeten de xeito reaccionario, outros non. Pero a primeira
culpa é dos que se dedican a aumentar gradualmente a temperatura. A segunda
culpa é daqueles que condenan aos que están no cuarto en lugar de formular unha
estratexia para tirar abaixo o cuarto.
Slavoj Zizek captou en parte esta dinámica
que se reforza mutuamente entre o terrorismo islámico e o liberalismo:
“O fundamentalismo é unha reacción —unha reacción
falsa e mistificadora, por suposto— contra dun fallo real do liberalismo e é
por iso que é ,unha e outra vez, xerado polo liberalismo…. Pensar nunha resposta
aos asasinatos de París significa deixar atrás a autosatisfacción petulante do
liberal permisivo e aceptar que o conflito entre a permisividade liberal e o
fundamentalismo é, en última instancia, un falso conflito; un círculo vicioso
de dous polos que se xeran e presupoñen un ao outro”.
Isto é certo… pero só no nivel da ideoloxía.
As forzas materiais que encarnan estas dúas ideoloxías non son en absoluto
iguais. Na medida en que o extremismo islámico é a ideoloxía de pequenas
cantidades de musulmáns en Europa esta non ten a mesma forza que os media,
sistema educativo e aparatos do estado que sosteñen o liberalismo e á dereita.
Mesmo se incluímos a estados enteiros e actores non estatais do Oriente Medio,
os estados do Golfo e ISIS, son económica e militarmente elementos moito máis
débiles no sistema mundial en comparación coa maquinaria de estado dos EEUU e
dos seus aliados.
E a solución de Zizek é tamén só
abstractamente correcta:
“Abandonado a si mesmo, o liberalismo
socavarase a si mesmo lentamente —o único que pode salvar os seus valores
fundamentais é unha renovada esquerda. Para que este legado sobreviva, o
liberalismo precisa a axuda fraterna da esquerda radical. Esta é a única
maneira de derrocar o fundamentalismo, varrer o chan que está baixo os seus pés”
[…]”O que Max Horkheimer dixera sobre o fascismo e o capitalismo xa por volta
de 1930 —aqueles que non queiran falar criticamente sobre o capitalismo
deberían calar tamén sobre o fascismo— debería ser tamén aplicado ao
fundamentalismo de hoxe: os que non queiran falar criticamente sobre a
democracia liberal deberían tamén calar sobre o fundamentalismo relixioso”.
Pero se a esquerda pretende gañar esta batalla
algo que ten que facer é construír unha forma alternativa de política radical
con aqueles da comunidade musulmá que rexeitan o racismo, a pobreza e a guerra.
Non hai xeito de que Zizek entenda isto. Os únicos musulmáns aos que se refire
son os extremistas. De feito, o que ten que dicir sobre esta cuestión está
imbuído da actitude liberal que denuncia. Sostén que o noso pensamento “non ten
nada que ver coa barata relativización do crime (o mantra de “quen son os de
Occidente, perpetradores de masacres terribles no terceiro mundo, para condenar
eses actos”). Menos aínda ten que ver co medo patolóxico de moitos esquerdistas
liberais occidentais a seren acusados de islamófobos. Para eses falsos esquerdistas,
calquera crítica ao islám é denunciada como unha expresión de islamofobia
occidental”.
Hai demasiada confianza na oposición idealista
de formas conceptuais e pouco de materialismo dialéctico marxista, por non
falar de activismo político marxista, na análise de Zizek. Isto non sorprende.
Zizek é, despois de todo, simplemente un filósofo e non un activista político,
mentres que definitorio de ser marxista é que un é dous. En resumo, Zizek só
contrapón idealmente o rexurdimento da esquerda ao reforzamento mutuo dos falidos
liberalismo e terrorismo. Pero non ten idea de que alianzas prácticas e formas
de actividade política son necesarias para conseguir levar iso a cabo.
Porén, tal e como nos atopamos hoxe, non son
difíciles de ver. A esquerda debe establecer alianzas con todo aquel, incluídos
liberais e musulmáns cos que temos diferenzas de análise, que estean contra o
racismo, a guerra e a pobreza. Estas deben ter a forma de movementos prácticos
e activos, non de tertulias. Debemos dicir claramente que as maiores forzas que
están a subir a temperatura son o estado, as corporacións e a elite política.
Os extremistas islámicos (e a extrema dereita) son produtos reaccionarios da
crise, un produto que empeora a crise, sobre todo para os musulmáns. Opómonos a
ambos. Pero un deses inimigos é moito máis poderoso, e por tanto máis culpable,
que o outro. Ese inimigo é o sistema capitalista global e os seus aparatos de
estado.
No hay comentarios:
Publicar un comentario